(هذه المادة من الجزء الثاني من ملف "أصوات كويرية". بإداة وإشراف المحرّر الضيف، فادي صالح، ويمكن قراءة النسخة الانكليزية من المقال على هذا الرابط).
إيمتا بلشنا كأطفال ننتبه عالصور ونستوعب ونتشبع بالمواد المرئية اللي بتعلمنا كيف نكون صبيان وبنات بالشكل اللي بيحبو المجتمع؟ إيمتا بلشنا نحس إنو حب أهالينا لإلنا مشروط بقديش فينا نعيد إنتاج وأداء هي الأدوار والتعابير الجندرية المتوقعة من الجندر المفروض علينا عند الولادة؟ كيف فينا نرجع لهديك المرحلة ونعيد تخيلها بطريقة بتناسب اختلافنا وخصوصيتنا كأفراد ونبحث فيها عن اللحظات اللي كنا نحس فيها بالأمان لنكون نحنا متل ما منحب من دون شروط؟
بالشغلات اللي بشتغلها، وخاصة اللي بتخصّني كتير، دائما بعرف إنو المشكلة بتبدأ بالطفولة، فدائما نحنا بأي شي بيصير معنا، ما منرجع بالحد الكافي لهديك الفترة ومنضل عم نحاربها، ومنفكرها إنو راحت وخلصناومالها اي تأثير على حياتنا ، بس الحقيقة مانا هيك، لإنو هاد مكان التأسيس، خصوصي إنو نحنا طالعين من بيئات كتير سيئة للأطفال، وخاصة إذا كانو االأطفال ما بيتناغمو مع الأدوار والأداءات الجندرية المفروضة والمتوقعة منهن ...فدائما بالمشاريع اللي بشتغلها بحاول إرجع للذاكرة تبعي أنا وصغيرة، مع أهلي، بالبيت والمدرسة والشارع، وبحس إنو أغلب العالم متلي يعني، أكيد كل العالم بتفكر بطفولتها بس ما بتسترجي تحكي بهاد الموضوع، يمكن لإنو بيخافو على أهلن أو ما بيحبو يرجعو لهداك المكان ويلي بأغلب الأحيان بحدد كيف رح نكمل حياتنا وأديه عنا وعي لنحاول نغير ونحب حالنا متل ما نحنا، بس الشغلة الأكيدة إنو نحنا وقت منكون كتير صغار، ما في عنا القدرة عالتعبير بطريقة بيفهموها الكبار، ما منعرف نعبر عن الشغل، وما منعرف نحكي عنّا بطرق نمطية، فعطول منعبر بطريقة كتير مختلفة منشان هيك بحس لازم نحنا نشتغل عالذاكرة تبعنا عمشاكلنا نحنا وصغار ونحاول نعترف فيها و نحلا ، لإنو إذا ما رجعت للأساس، واللي هوي البيت، في شغلات ما بتخلص كل حياتنا!.
كان يا ما كان في كتاب القراءة!
من أول ما بتولد ببلشوا يفصلو بينا، الصبي لونو أزرق، البنت زهري، بعدين ببلشوا يخبرونا انو هاد بصير وهاد ما بصير ويتقبلونا على حسب أشكالنا و التصنيفات يلي بفضلوها من ضمن الشغلات اللي عطول بحكي عنا أنا ورفقاتي هيي حصص التدبير المنزلي اللي كنا ناخدا بسوريا. كيف من نحنا وبالمدرسة عم يجهزونا لهذا الدور. بالابتدائي، الأدوار دائما مقسّمة بكتاب القراءة، إنو الأم عم تطبخ والأب قاعد عم يقرا مجلة أو البنت عم تساعد إمها بتحضير الطاولة، بس الولد قاعد عم يلعب بالطابة. دائما في هاد الفصل، بتخلص من مرحلة كتاب القراءة بيبطل شي مقروء وبيصير شي ملموس، بتفوت عحصة التدبير المنزلي وبتفوت عحصة الخياطة... كتير غريبة هي حالة الفصل الدائم حسب الأدوار الجندرية... ما إلها تأثير بس عالبنات اللي ما بيحسو بأي انتماء لهالأدوار، بس كمان عالصبيان اللي ممكن بيحبو ياخدو بعض هالأدوار ويتعلموها. الأطفال اللي مختلفين جندريًا واللي بيحبو يجربو يعبرو عن جندرن أو أحاسيسن بطريقة غير نمطية وغير مقبولة من المجتمع، عادة ما بيلاقو حالن مصورين بكتاب القراءة أو كتب الأطفال السائدة في المجتمع.
فبقعد بتسائل:هل حدثت هذي الأحدوثة حقا في تلك الأيام؟ والشخصيات المذكورة هل عاشت أم كانت أوهام؟ هون عم وجه سؤال للعالم: هل فعلا صار عنّا هالشي اللي عم ارسمو بهالمكان بيوم من الأيام ولا أنا عم أتخيل وأخلق ذاكرة بديلة إلكن وإلي؟ قديش ممكن يكون فيو الموضوع قبول لما تكون الشخصية هيي بنت صغيرة وبدها تحلق شعرا بطريقة "مختلفة"؟
كتير سهل نقرأ كتب تنمية ومقالات عن حب الذات والتصالح وكتير سهل نقول للعالم حبوا حالكون بس كتير صعب إنو نطبق هاد الموضوع خصوصي لما منكون ببيئة ما قبلتنا متل ما نحنا و عطول عم تطالبنا بأشياء فوق طاقتنا أو عم تلبسنا شي ما بيشبهنا بس لحتى نكون مقبولين وهدول لاشخاص للاسف بلاغلب بكونوا الاهل و البيئة المحيطة يلي ممكن تكون اكتر مكان تنأذي في بحياتك بحجة الحب.
لو عن جد بيعرفوا لاهل اديش الطفل يلي جواتنا عم يتعذب بسبب الجهل اللي عم يتمارس علينا، كان يمكن يحسبوا حساب لكل كلمة مؤذيه او شرط عم يحطوا على ولادون بدون ما يحسو، لانو ما لازم يكون في حدا بيتقبل إنو يعيشو أطفالو بتعاسه مشان المجتمع يكون مبسوط و راضي.
