هذا النص جزء من سلسلة الخيال العلمي.
هلق ليش الخيال العلمي بيشوف إنه مستقبل الشرق الأوسط بيواجه عقبات أكتر من أيّ مكان آخر، بتوقع لأسباب بيئيّة أكتر من الأسباب السياسيّة. الأسباب السياسيّة طبعًا موجودة، بس أنا بشوف إنّه الصراعات دائمًا رح تنتقل من مكان لمكان، فإذا هي هلق عندنا، ممكن تكون بمكان تاني بعدين. طبعًا نحن رح نكون، قد نكون، عم نعاني، أو لاء، لأنّه بعد 300 سنة كتير كتار. 300 سنة يعني منشوف واقع بريطانيا سنة 1200، وواقع بريطانيا سنة 1400، وواقع بريطانيا سنة 1700، منلاقي اختلاف جذري. أو مثلًا واقع بلدان المنطقة تبعيتنا سنة 600 ميلادي وسنة 900 ميلادي منلاقي كمان تغيرات جذريّة فَـ أتوقع المناخ أو البيئة هو أكتر العوامل يلي رح تكون سيئة بالمنطقة عنّا لأسباب نقص المياه مع ارتفاع عدد السكان، هذا نحنا كلّنا عم نشوفه على أساس فيه 300 سنة، يعني بقيانة حياة بالكرة الأرضيّة.
بتوقع مو بالضرورة يكون المستقبل ديستوبي أو سيء، يعني منرجع منقول حسب شو بده يصير، يعني واقع أي دولة او أيّ أمة ممكن يتغير بـ 50 سنة أو 100 سنة. نحن عم نحكي بعد 300 سنة ممكن يكون صار... ما بعرف شو ممكن يكون صار.
ممكن تكون دابت أصلًا، الناطقين بالعربيّة قلّوا ودابوا أو يمكن يكتروا، ما منعرف. فَـ لأ ما بتوقع أنا، يعني التفريق هذا ما بتوقع إنه شي صحي إنّه دائمًا منقول إنّه ناس معينين رح يكونوا عندهم نظرة ديستوبيّة، ولا لازم يكون عندون هي النظرة للمستقبل.
الخيال العلمي في منطقة الشرق الأوسط وشمال إفريقيا: أداة فنية للتغيير
26 نيسان 2021
برجع بقول الديستوبيّة ممكن موجودة بعد 20 سنة أو خمسين سنة، بس 300 كتار 300 عم نحكي نحنا عن عشر أجيال يعني بيتغير فيهون واقع كامل، ما بعرف شو بده يصير، ممكن يكون صار وممكن نكون صرنا بالفضاء، بكواكب تانية.
شو علاقتي أنا بالمستقبل البعيد؟ ما بفكر فيه كتير بصراحة . فَـ ما عندي أيّ... ما بفكر فيه يعني، لأنّه تفكيري منحصر بالشكل الأعّم والأغلب بواقع بلدي وواقع شعبي والمستقبل القريب تبعه، كم سنة، سنتين.. خمسة.. عشرة.. هيك عشرين ثلاثين ممكن بس مو أكتر.
كيف بتخيل المستقبل لبلادي بعد 300 سنة؟ متغيّر يعني ما بتوقع نفس الحدود رح تضل ما بتوقع نفس الشكل رح يضل للدولة. بتوقّع العالم يتجه باتجاه العولمة أكتر. السؤال صعب. الفكرة حلوة بس صعبة. 300 سنة كتير كتار. أنا برأيي يعني، بتوقع الفضاء رح يكون موجود، يعني الإنسان رح يكون استعمر الفضاء في حال ضلينا 300 سنة أصلًا. يعني إنّه بتوقع الحياة طبعًا حتروح كتير بإتجاه الذكاء الصناعي. بتوقع عدد السكان رح يقل، ما الإنسان مع انخفاض التواصل البشري المباشر، رح يصير التواصل برأيي أكتر و أكتر من بعيد لبعيد.
طبعًا هذا كلّه عم نحكي في حال ما صار انهيار للحضارة، انهيار للتطور، إنّه قد يصل الإنسان لمكان، متل ما بتتوقع معظم الأفلام الديستوبيّة الأمريكيّة، مو العربيّة، يعني اللي هو إنّه رح يصير في انهيار للحضارة بالنهاية، وهذا شي متوقع مع طمع الإنسان ومع جشعه. نحن عمليًا عم نخلّص الموارد تبع السنة بشهر ستة أو سبعة مو أكتر، يلي هي الطاقة المائيّة وطاقة النفط والأكل والشرب والمياه وطاقة الشمس. كلّه عم نخلصه بشهر ستة وسبعة يعني نحن عم نتعدى على مقدرات مستقبل أطفالنا وأحفادنا.
ما بعرف أفلام و روايات خيال علمي عربيّة. ما بعرف غير شويّة روايات للدكتور أحمد خالد توفيق ومسلسل واحد بعرفه بس ديستوبي كوميدي يلي هو "خلصانة بشياكة" وهو مسلسل مصري، بس هدول حلوين. هلق أنا الروايات ما قرأتها بصراحة، عندي فكرة عنها بس ما قريتها، بس هي نتاج لما نتوقعه. بس مافي شي بتوقع بيروح بإتجاه 300 سنة,، لأنه 300 سنة بعيدة يعني ما في غير الشغلات الأمريكيّة بتروح باتجاه 300 سنة، يلي هو كتير مستقبل و فضاء، طبعًا دائمًا بيكون بالفضاء ولابسين العالم كلياتهم يونيفورم (لباس موحّد) ما حدا بيعرف ليش وعلى تواصل مع كائنات فضائيّة بس يعني ما بتوقع انعمل شي كتير مبني على معطيات لإنه عمليًا صعب.
أعمال عربيّة مافي لانّه نحن أصلًا إنتاجنا قليل بهاد المجال، الإنتاج الأميركي يمكن يكون موجود أكتر، بس بيكون بمعظم الأحيان معتمد على الخيال العلمي للتسلية للترفيه ومو مبني على معطيات: اتصال مع كواكب تانية مع مجرات تانية مع كائنات فضائيّة، بس يعني لأنّه عمليًا صعب نتوقع 300 سنة كتار، و دائمًا بيتجهوا بإتجاه العولمة أو البقاء الما بعرف شو بدنا نسميها، "الكوننة"؟ بيصير إنه الكون بيتحول لقرية صغيرة.
